Der Kinderfreſſer.

Ich bin der Kinderfreſſer gnant/
Den Mütteren gantz wol bekandt/
Die ihre Kinder mit mir stillen/
Wann ſie thon weinen/schreyen/grillen.

SCHaw da den Kindlfreſſer an/
Wie er iſt ſo ein ſcheutzlicher Mann
Hat ein grob/wild/geſtrobelet Haar/
Sein Bat iſt rauch/vndzottet gar
Hat zwen groß Backen/ein groß Maul/
Und frißt recht wie ein Ackergaul/
Lauffe mit ſein Stiflen gſchwind herumb/
Zu allen Häuſſern/loßt ob fromb/
Die Kinder ſeyen oder nit/
Und wann er eines dann betrit/
Das greint/vnd ſchlecht nit ſchweigen will/
So ſchleicht er dann hinzu gantz ſtill/

Und ſchawet/ob er mit ſein dappen/
Solchs greinet Kindlein mög er ſchnappen
So er dann eines thut erhaſchen/
Steckt ers bald in ſein groſſe Taſchen/
Wie den Kopff eins dann auſſer reckt/
Das er bald in ſein Hauß heim tregt/
Und thut es von einander reiſſen/
Mit ſeinen Zänen auch zerbeiſſen/
So du dann nit wilt ſchweigen eben/
So will ich dich dem Mann auch geben/
Drumb ſchweig fein ſtill fromb in das Hauß
Das er dich nit find greinend drauß.

In Augſpurg/bey Lorentz Schultes Brieffmaler in Jacober Vorſtatt/im Ferbhoff.